کسی نے کچھ کہا ہے کیا ، کہاں یہ چل دیا سورج

Posted in دیوان منصور

 {mp3}ma_dn_91{/mp3}


 

کسی نے کچھ کہا ہے کیا ، کہاں یہ چل دیا سورج

ابھی دیکھا تھا اپنی روشنی کے ساتھ تھا سورج

 

اسے معلوم تھی شاید مری راتوں کی برفابی

مری آنکھوں کے بالکل سامنے دن بھر رہا سورج

 

چپک جاتا ہے خاموشی سے میرے ساتھ بستر میں

یہ نم دیدہ دسمبر کی اداسی سے بھرا سورج

 

برہنہ پانیوں پر شام کی کرنیں ٹپکتی تھیں

مگر پھر یوں ہوا نیلا سمندر ہو گیا سورج

 

مرے دریا کے پانی کو ہوا ہونے نہیں دیتا

کہیں برفیلے کہساروں کو پگھلاتا ہوا سورج

 

یہ کافی دیر سے کھڑکی کھلی ہے میرے کمرے کی

ابھی نکلا نہیں ہے اِس گلی میں صبح کا سورج

 

ابھی کچھ دیر رہنا چاہتا ہوں میں اجالوں میں

بلاتا ہے مجھے اپنی طرف پھر ڈوبتا سورج

 

مجھے شب کی گلی میں بھی پتش محسوس ہوتی ہے

خود اپنے ہجر میں اتنا زیادہ جل بجھا سورج

 

اُدھر پوری طرح اترا نہیں وہ روشنی کا تھال

نکلتا آ رہا ہے یہ کدھر سے دوسرا سورج

 

رکھا ہے ایک ہی چہرہ بدن کے بام پر میں نے

کوئی کہتا ہے یوں ہی ہے کسی کا تبصرہ سورج

 

نگاہوں کو شعاعوں کی ضرورت تھی بہت لیکن

کہاں تک میری گلیوں میں مسلسل جاگتا سورج

 

جہاں اس وقت روشن ہے تبسم تیرے چہرے کا

اسی وحشت میں برسوں تک یہ آوارہ پھرا سورج

 

اسے اچھے نہیں لگتے یہ میرے رتجگے شاید

اکیلا چھوڑ جاتا ہے ہمیشہ بے وفا سورج

 

اجالے کا کفن بُننا کوئی آساں نہیں ہوتا

نظر آتا ہے شب کے پیرہن سے جابجا سورج

 

ابھرنا ہی نہیں میں نے نکلنا ہی نہیں میں نے

اتر کر عرش کے نیچے یہی ہے سوچتا سورج

 

افق پر اک ذرا آندھی چلی تھی شام کی منصور

کہیں ٹوٹی ہوئی ٹہنی کی صورت گر پڑا سورج